ਬੰਦ ਫ਼ੋਨ, ਲੈਪਟਾਪ ‘ਤੇ ਵੀ ਕੰਮ ਕਰੇਗਾ AI

ਗੂਗਲ ਹੁਣ ਸਿਰਫ਼ ਇੱਕ ਸਰਚ ਇੰਜਣ ਕੰਪਨੀ ਨਹੀਂ ਰਹਿਣਾ ਚਾਹੁੰਦੀ। ਉਸਦਾ ਅਗਲਾ ਟੀਚਾ ਕੰਜ਼ਿਊਮਰ AI ਦੀ ਦੁਨੀਆ ਵਿੱਚ ਉਹੀ ਦਬਦਬਾ ਬਣਾਉਣਾ ਹੈ, ਜੋ ਕਦੇ ਇੰਟਰਨੈੱਟ ਸਰਚ ਵਿੱਚ ਸੀ। ਅਤੇ ਹੁਣ ਅਜਿਹਾ ਲੱਗਣ ਲੱਗਾ ਹੈ ਕਿ ਉਹ ਓਪਨAI ਤੋਂ AI ਦੀ ਦੌੜ ਵਿੱਚ ਤਾਜ ਖੋਹ ਸਕਦੀ ਹੈ। 19 ਮਈ ਨੂੰ ਗੂਗਲ ਨੇ ਨਵੇਂ ਜੈਮਿਨੀ 3.5 ਫਲੈਸ਼ ਮਾਡਲ ਨਾਲ ਚੱਲਣ ਵਾਲੇ AI ਏਜੰਟਾਂ ਦੀ ਲੜੀ ਪੇਸ਼ ਕੀਤੀ। ਇਨ੍ਹਾਂ ਵਿੱਚ ਅਜਿਹੇ AI ਕੋਡਰ ਵੀ ਸ਼ਾਮਲ ਹਨ ਜੋ ਓਪਨAI ਅਤੇ ਐਂਥਰੋਪਿਕ ਦੇ ਟੂਲਸ ਨੂੰ ਚੁਣੌਤੀ ਦੇਣ ਲਈ ਬਣਾਏ ਗਏ ਹਨ।

ਗੂਗਲ ਲਾਂਚ ਕਰ ਰਿਹਾ ਨਵੇਂ ਏਜੰਟ 

ਗੂਗਲ ਦਾ ਫੋਕਸ ਹੁਣ ਸਿਰਫ਼ ਚੈਟਬੋਟ ‘ਤੇ ਨਹੀਂ, ਬਲਕਿ “ਕੰਮ ਕਰਨ ਵਾਲੇ AI” ‘ਤੇ ਹੈ। ਕੰਪਨੀ ਅਜਿਹੇ ਏਜੰਟ ਲੈ ਕੇ ਆ ਰਹੀ ਹੈ ਜੋ ਯੂਜ਼ਰ ਦੇ ਫ਼ੋਨ ਜਾਂ ਲੈਪਟਾਪ ਬੰਦ ਕਰਨ ਤੋਂ ਬਾਅਦ ਵੀ ਕੰਮ ਜਾਰੀ ਰੱਖ ਸਕਣਗੇ। “ਜੈਮਿਨੀ ਸਪਾਰਕ” ਨਾਮ ਦਾ ਏਜੰਟ ਈਮੇਲ ਸਕੈਨ ਕਰਨ, ਗਰੁੱਪ ਟ੍ਰਿਪ ਦਾ ਆਯੋਜਨ ਕਰਨ ਵਰਗੇ ਕਈ ਡਿਜੀਟਲ ਕੰਮ ਆਪਣੇ ਆਪ ਨਿਪਟਾ ਸਕੇਗਾ। ਉੱਥੇ ਹੀ ਗੂਗਲ ਸਰਚ ਵਿੱਚ ਜੋੜੇ ਜਾ ਰਹੇ “ਇਨਫਰਮੇਸ਼ਨ ਏਜੰਟ” ਸਪੋਰਟਸ ਟੂਰਨਾਮੈਂਟਾਂ, ਸ਼ਾਪਿੰਗ ਸੇਲਜ਼ ਅਤੇ ਸ਼ੇਅਰ ਬਾਜ਼ਾਰ ‘ਤੇ ਨਜ਼ਰ ਰੱਖਣਗੇ। ਉਸਦੇ ਕੁਝ ਏਜੰਟ ਸਿੱਧੇ ਜੈਮਿਨੀ ਐਪ ਵਿੱਚ ਹੋਣਗੇ, ਜਿਸਦੀ ਵਰਤੋਂ ਹਰ ਮਹੀਨੇ ਕਰੀਬ 90 ਕਰੋੜ ਲੋਕ ਕਰ ਰਹੇ ਹਨ। ਕੁਝ AI ਫੀਚਰਸ ਗੂਗਲ ਸਰਚ ਵਿੱਚ ਜੁੜਨਗੇ। ਇਸ ਨਾਲ ਓਪਨAI ‘ਤੇ ਦਬਾਅ ਵੱਧ ਸਕਦਾ ਹੈ।

ਓਪਨ AI ਦਾ ਰੈੱਡ ਕੋਡ 

ਦਰਅਸਲ, ਗੂਗਲ ਦੀ ਤੇਜ਼ੀ ਨੇ ਓਪਨAI ਨੂੰ ਪਹਿਲਾਂ ਹੀ ਸੁਚੇਤ ਕਰ ਦਿੱਤਾ ਸੀ। ਨਵੰਬਰ ਵਿੱਚ ਜੈਮਿਨੀ-3 ਮਾਡਲ ਆਉਣ ਤੋਂ ਬਾਅਦ ਓਪਨAI ਦੇ ਸੀਈਓ ਸੈਮ ਆਲਟਮੈਨ ਨੇ ਕਰਮਚਾਰੀਆਂ ਲਈ “ਕੋਡ ਰੈੱਡ” ਐਮਰਜੈਂਸੀ ਜਾਰੀ ਕੀਤੀ ਸੀ। ਇਸ ਤੋਂ ਬਾਅਦ ਕੰਪਨੀ ਨੇ ਆਪਣੇ ਕੋਡਿੰਗ ਏਜੰਟਾਂ ‘ਤੇ ਫੋਕਸ ਵਧਾਇਆ। ਪਰ ਜੈਮਿਨੀ 3.5 ਫਲੈਸ਼ ਅਤੇ ਨਵੇਂ AI ਏਜੰਟਾਂ ਨੇ ਫਿਰ ਚੈਟਜੀਪੀਟੀ ਦੀ ਬੜ੍ਹਤ ‘ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਗੂਗਲ ਦੀ ਪੇਰੈਂਟ ਕੰਪਨੀ ਅਲਫਾਬੇਟ ਇਨਕਾਰਪੋਰੇਸ਼ਨ ਦੀ ਮਾਰਕੀਟ ਵੈਲਿਊ ਜਨਵਰੀ ਦੇ 382 ਲੱਖ ਕਰੋੜ ਰੁਪਏ ਤੋਂ ਵਧ ਕੇ ਹੁਣ ਲਗਭਗ 478 ਲੱਖ ਕਰੋੜ ਰੁਪਏ ਤੱਕ ਪਹੁੰਚ ਗਈ ਹੈ।

ਕੰਪਿਊਟਿੰਗ ਕਾਸਟ ਦਾ ਹੜ੍ਹ

ਹਾਲਾਂਕਿ ਇਸ ਸਫ਼ਲਤਾ ਦੇ ਨਾਲ ਚੁਣੌਤੀਆਂ ਵੀ ਵੱਧ ਰਹੀਆਂ ਹਨ। ਸੀਈਓ ਸੁੰਦਰ ਪਿਚਾਈ ਮੁਤਾਬਕ AI ਦੀ ਵਰਤੋਂ ਮਾਪਣ ਵਾਲੇ ਟੋਕਨਾਂ ਦੀ ਗਿਣਤੀ ਇੱਕ ਸਾਲ ਪਹਿਲਾਂ 480 ਖਰਬ ਸੀ, ਜੋ ਹੁਣ ਵਧ ਕੇ ਹਰ ਮਹੀਨੇ 3.2 ਕਵਾਡ੍ਰਿਲੀਅਨ (3.2 ਤੋਂ ਬਾਅਦ 15 ਜ਼ੀਰੋ) ਹੋ ਗਈ ਹੈ। ਇਸਦਾ ਮਤਲਬ ਹੈ ਕਿ ਕੰਪਿਊਟਿੰਗ ਕਾਸਟ (ਲਾਗਤ) ਤੇਜ਼ੀ ਨਾਲ ਵੱਧ ਰਹੀ ਹੈ। ਖ਼ਰਚਾ ਘਟਾਉਣ ਲਈ ਗੂਗਲ AI ਸੇਵਾਵਾਂ ਵਿੱਚ ਇਸ਼ਤਿਹਾਰ ਜੋੜ ਸਕਦੀ ਹੈ। ਫਿਲਹਾਲ ਜੈਮਿਨੀ ਐਪ ਵਿੱਚ ਇਸ਼ਤਿਹਾਰ ਨਹੀਂ ਹਨ, ਪਰ ਗੂਗਲ ਨੇ ਸਰਚ ਸੇਵਾਵਾਂ ਦੇ AI-ਜਨਰੇਟਿਡ ਜਵਾਬਾਂ ਵਿੱਚ ਇਸ਼ਤਿਹਾਰ ਦਿਖਾਉਣੇ ਸ਼ੁਰੂ ਕਰ ਦਿੱਤੇ ਹਨ। ਇਹੋ ਸੰਕੇਤ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ AI ਸਿਰਫ਼ ਇੱਕ ਤਕਨੀਕੀ ਲੜਾਈ ਨਹੀਂ, ਬਲਕਿ ਦੁਨੀਆ ਦਾ ਸਭ ਤੋਂ ਵੱਡਾ ਇਸ਼ਤਿਹਾਰਬਾਜ਼ੀ ਅਤੇ ਡੇਟਾ ਕਾਰੋਬਾਰ ਵੀ ਬਣਨ ਜਾ ਰਿਹਾ ਹੈ।

ਪੂੰਜੀਗਤ ਖ਼ਰਚਾ ਛੇ ਗੁਣਾ ਵਧੇਗਾ

AI ਟੋਕਨ ਜਨਰੇਟ ਕਰਨ ਲਈ ਕੰਪਿਊਟਿੰਗ ਪਾਵਰ ਲੱਗਦੀ ਹੈ। ਇਸ ਕਾਰਨ ਗੂਗਲ ਦਾ ਪੂੰਜੀਗਤ ਖ਼ਰਚਾ (Capital Expenditure) ਚਾਰ ਸਾਲ ਪਹਿਲਾਂ ਨਾਲੋਂ ਛੇ ਗੁਣਾ ਵੱਧ ਕੇ ਇਸ ਸਾਲ 18.18 ਲੱਖ ਕਰੋੜ ਰੁਪਏ ਹੋ ਜਾਵੇਗਾ। ਚਿਪਸ ਤੋਂ ਲੈ ਕੇ ਬਿਜਲੀ ਦੀਆਂ ਕੀਮਤਾਂ ਵਧਣ ਕਾਰਨ ਇਹ ਖ਼ਰਚਾ ਹੋਰ ਵੀ ਵੱਧ ਸਕਦਾ ਹੈ।