ਕਲੇਜੀ ਖਾਣ ਦੇ ਕੀ ਫਾਇਦੇ ਹਨ? ਕਿਸਨੂੰ ਖਾਣੀ ਚਾਹੀਦੀ ਹੈ, ਕਿਸਨੂੰ ਨਹੀਂ

ਡਾਕਟਰ ਅਤੇ ਡਾਇਬਟੀਜ਼ ਮਾਹਰ ਪ੍ਰਸ਼ਾਂਤ ਅਰੁਣ ਕਹਿੰਦੇ ਹਨ, “ਸਾਨੂੰ ਆਸਾਨੀ ਨਾਲ ਮਿਲਣ ਵਾਲਾ ਕੁੱਕੜ ਜਾਂ ਬੱਕਰੀ ਦੀ ਕਲੇਜੀ ਪੋਸ਼ਕ ਤੱਤਾਂ ਨਾਲ ਭਰਪੂਰ ਹੁੰਦੀ ਹੈ। ਉਦਾਹਰਨ ਲਈ, ਇਸ ਵਿੱਚ ‘ਹੀਮ’ ਆਇਰਨ ਵੱਧ ਮਾਤਰਾ ਵਿੱਚ ਹੁੰਦਾ ਹੈ, ਜੋ ਸਰੀਰ ਆਸਾਨੀ ਨਾਲ ਜ਼ਜ਼ਬ ਕਰ ਲੈਂਦਾ ਹੈ। ਇਹ ਖੂਨ ਦੀ ਗਤੀ ਨੂੰ ਸੁਧਾਰਦਾ ਹੈ ਅਤੇ ਖੂਨ ਦੀ ਕਮੀ (ਐਨੀਮੀਆ) ਤੋਂ ਬਚਾਉਂਦਾ ਹੈ।”

ਉਹ ਇਹ ਵੀ ਕਹਿੰਦੇ ਹਨ ਕਿ ਕਲੇਜੀ ਵਿੱਚ ਮੌਜੂਦ ਵਿਟਾਮਿਨ ਬੀ12 ਰੈੱਡ ਬਲੱਡ ਸੈੱਲ ਦੀ ਬਣਤਰ, ਨਰਵਾਂ ਦੀ ਸਿਹਤ, ਦਿਮਾਗ਼ੀ ਵਿਕਾਸ ਅਤੇ ਯਾਦ ਸ਼ਕਤੀ ਲਈ ਮਹੱਤਵਪੂਰਨ ਹੈ।

ਪ੍ਰਸ਼ਾਂਤ ਅਰੁਣ ਮੁਤਾਬਕ, ਜਾਨਵਰਾਂ ਦੀ ਕਲੇਜੀ ਵਿੱਚ ਉੱਚ ਗੁਣਵੱਤਾ ਵਾਲਾ ਪ੍ਰੋਟੀਨ ਹੁੰਦਾ ਹੈ, ਜੋ ਮਾਸਪੇਸ਼ੀਆਂ ਦੀ ਮੁਰੰਮਤ ਅਤੇ ਵਿਕਾਸ ਲਈ ਜ਼ਰੂਰੀ ਹੈ ਅਤੇ ਬੀਮਾਰੀ ਤੋਂ ਬਾਅਦ ਸੁਧਾਰ ਵਿੱਚ ਮਦਦ ਕਰਦਾ ਹੈ।

ਯੂਕੇ ਦੀ ਨੈਸ਼ਨਲ ਹੈਲਥ ਸਰਵਿਸ ਦੇ ਅਨੁਸਾਰ, ਕਲੇਜੀ ਵਿੱਚ ਵਿਟਾਮਿਨ ਏ ਵੀ ਵੱਧ ਮਾਤਰਾ ਵਿੱਚ ਹੁੰਦਾ ਹੈ।

ਇਹ ਵਿਟਾਮਿਨ ਏ ਸਰੀਰ ਦੀ ਰੋਗ-ਪ੍ਰਤੀਰੋਧਕ ਸਮਰੱਥਾ ਨੂੰ ਬਿਮਾਰੀਆਂ ਅਤੇ ਇਨਫੈਕਸ਼ਨਾਂ ਖ਼ਿਲਾਫ਼ ਠੀਕ ਤਰੀਕੇ ਨਾਲ ਕੰਮ ਕਰਨ ਵਿੱਚ ਮਦਦ ਕਰਦਾ ਹੈ।

ਇਸ ਤੋਂ ਇਲਾਵਾ, ਵਿਟਾਮਿਨ ਏ ਨਜ਼ਰ, ਚਮੜੀ ਦੀ ਸਿਹਤ ਅਤੇ ਸਰੀਰ ਦੇ ਕੁਝ ਹਿੱਸਿਆਂ ਜਿਵੇਂ ਨੱਕ ਦੀਆਂ ਝਿਲੀਆਂ ਦੀ ਸਿਹਤ ਕਾਇਮ ਰੱਖਣ ਵਿੱਚ ਵੀ ਮਦਦਗਾਰ ਹੈ।

ਹਾਲਾਂਕਿ ਵਿਟਾਮਿਨ ਏ ਦੁੱਧ, ਪਨੀਰ, ਆਂਡਿਆਂ ਅਤੇ ਸੈਲਮਨ ਅਤੇ ਸਾਰਡੀਨ ਵਰਗੀਆਂ ਚਰਬੀ ਵਾਲੀਆਂ ਮੱਛੀਆਂ ਵਿੱਚ ਵੀ ਮਿਲਦਾ ਹੈ, ਯੂਕੇ ਦੀ ਨੈਸ਼ਨਲ ਹੈਲਥ ਸਰਵਿਸ ਮੁਤਾਬਕ ਜਾਨਵਰਾਂ ਦੀ ਕਲੇਜੀ ਵਿੱਚ ਇਹ ਬਹੁਤ ਵੱਧ ਮਾਤਰਾ ਵਿੱਚ ਹੁੰਦਾ ਹੈ

ਕੀ ਬੱਚਿਆਂ ਨੂੰ ਕਲੇਜੀ ਦੇ ਸਕਦੇ ਹਾਂ?

ਨਿਊਟ੍ਰੀਸ਼ਨਿਸਟ ਧਾਰਿਨੀ ਕ੍ਰਿਸ਼ਨਨ ਕਹਿੰਦੀ ਹੈ, “ਆਮ ਤੌਰ ‘ਤੇ ਗ਼ੈਰ-ਸ਼ਾਕਾਹਾਰੀ ਖਾਣੇ ਵਿੱਚ ਮਿਲਣ ਵਾਲਾ ‘ਹੀਮ ਆਇਰਨ’ ਕਲੇਜੀ ਵਿੱਚ ਵੱਧ ਹੁੰਦਾ ਹੈ। ਇਸ ਲਈ 5 ਤੋਂ 10 ਸਾਲ ਦੇ ਬੱਚਿਆਂ ਨੂੰ ਹਫ਼ਤੇ ਵਿੱਚ ਇੱਕ ਵਾਰ ਲਗਭਗ 50 ਗ੍ਰਾਮ ਅਤੇ 10 ਤੋਂ 15 ਸਾਲ ਦੇ ਬੱਚਿਆਂ ਨੂੰ ਹਫ਼ਤੇ ਵਿੱਚ ਇੱਕ ਵਾਰ 50 ਤੋਂ 100 ਗ੍ਰਾਮ ਕਲੇਜੀ ਪਕਾ ਕੇ ਦਿੱਤੀ ਜਾ ਸਕਦੀ ਹੈ।”

ਉਹ ਕਹਿੰਦੀ ਹੈ ਕਿ ਇਸ ਵਿੱਚ ਮੌਜੂਦ ਵਿਟਾਮਿਨ ਬੀ12 ਬੱਚਿਆਂ ਦੀ ਵਿਕਾਸ ਲਈ ਮਹੱਤਵਪੂਰਨ ਹੈ, ਪਰ ਇਸ ਨੂੰ ਸੰਤੁਲਿਤ ਮਾਤਰਾ ਵਿੱਚ ਹੀ ਦੇਣਾ ਚਾਹੀਦਾ ਹੈ।

ਧਾਰਿਨੀ ਕ੍ਰਿਸ਼ਨਨ ਦਾ ਕਹਿਣਾ ਹੈ ਕਿ ਕਲੇਜੀ ਨੂੰ ਤੇਲ ਵਿੱਚ ਤਲ ਕੇ ਬੱਚਿਆਂ ਨੂੰ ਨਹੀਂ ਦੇਣਾ ਚਾਹੀਦਾ। ਉਹ ਕਹਿੰਦੀ ਹੈ, “ਤਲਣ ਨਾਲ ਇਸ ਵਿੱਚ ਮੌਜੂਦ ਵਿਟਾਮਿਨ ਬੀ12 ਨਸ਼ਟ ਹੋ ਜਾਂਦਾ ਹੈ। ਇਸ ਲਈ ਇਸ ਨੂੰ ਕਰੀ ਜਾਂ ਗ੍ਰੇਵੀ ਵਾਂਗ ਪਕਾ ਕੇ ਦੇਣਾ ਵਧੀਆ ਹੈ।”

ਇਸੇ ਤਰ੍ਹਾਂ, ਉਹ ਕਹਿੰਦੀ ਹੈ ਕਿ ਵੱਡਿਆਂ ਲਈ ਹਫ਼ਤੇ ਵਿੱਚ ਇੱਕ ਵਾਰ 100 ਤੋਂ 200 ਗ੍ਰਾਮ ਕਲੇਜੀ ਖਾਣਾ ਕਾਫ਼ੀ ਹੈ।

ਕਲੇਜੀ ਵਿੱਚ ਵਿਟਾਮਿਨ ਏ ਦੀ ਮਾਤਰਾ ਕਾਫ਼ੀ ਵੱਧ ਹੁੰਦੀ ਹੈ, ਇਸ ਲਈ ਯੂਕੇ ਦੀ ਨੈਸ਼ਨਲ ਹੈਲਥ ਸਰਵਿਸ ਮੁਤਾਬਕ ਗਰਭਵਤੀ ਔਰਤਾਂ ਨੂੰ ਇਸ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ, ਕਿਉਂਕਿ ਵੱਧ ਵਿਟਾਮਿਨ ਏ ਭਰੂਣ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ।

ਵਿਟਾਮਿਨ ਏ ਦੀ ਰੋਜ਼ਾਨਾ ਲੋੜ ਬਾਰੇ, 19 ਤੋਂ 64 ਸਾਲ ਦੇ ਵੱਡਿਆਂ ਲਈ ਪੁਰਸ਼ਾਂ ਲਈ 700 ਮਾਈਕ੍ਰੋਗ੍ਰਾਮ ਅਤੇ ਔਰਤਾਂ ਲਈ 600 ਮਾਈਕ੍ਰੋਗ੍ਰਾਮ ਦੀ ਸਿਫ਼ਾਰਸ਼ ਕੀਤੀ ਜਾਂਦੀ ਹੈ।

ਕੁਝ ਅਧਿਐਨ ਦਰਸਾਉਂਦੇ ਹਨ ਕਿ ਕਈ ਸਾਲਾਂ ਤੱਕ ਰੋਜ਼ਾਨਾ ਔਸਤ 1,500 ਮਾਈਕ੍ਰੋਗ੍ਰਾਮ ਤੋਂ ਵੱਧ ਵਿਟਾਮਿਨ ਏ ਲੈਣ ਨਾਲ ਹੱਡੀਆਂ ਪ੍ਰਭਾਵਿਤ ਹੋ ਸਕਦੀਆਂ ਹਨ ਅਤੇ ਉਮਰ ਦੇ ਨਾਲ ਹੱਡੀਆਂ ਟੁੱਟਣ ਦਾ ਖ਼ਤਰਾ ਵੱਧ ਸਕਦਾ ਹੈ।

ਇਹ ਗੱਲ ਖ਼ਾਸ ਤੌਰ ‘ਤੇ ਵੱਡੀ ਉਮਰ ਦੇ ਲੋਕਾਂ ਲਈ, ਖ਼ਾਸ ਕਰਕੇ ਔਰਤਾਂ ਲਈ ਮਹੱਤਵਪੂਰਨ ਹੈ, ਜਿਨ੍ਹਾਂ ਵਿੱਚ ਪਹਿਲਾਂ ਹੀ ਹੱਡੀਆਂ ਕਮਜ਼ੋਰ ਹੋਣ ਦੀ ਬਿਮਾਰੀ (ਓਸਟੀਓਪੋਰੋਸਿਸ) ਦਾ ਖ਼ਤਰਾ ਵੱਧ ਹੁੰਦਾ ਹੈ।

ਡਾ. ਪ੍ਰਸ਼ਾਂਤ ਅਰੁਣ ਕਹਿੰਦੇ ਹਨ, “ਜਿਨ੍ਹਾਂ ਦਾ ਕੋਲੇਸਟ੍ਰੋਲ ਵੱਧ ਹੈ, ਉਨ੍ਹਾਂ ਲਈ ਕਲੇਜੀ ਤੋਂ ਪਰਹੇਜ਼ ਕਰਨਾ ਬਿਹਤਰ ਹੈ। ਇਸੇ ਤਰ੍ਹਾਂ, 2 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਵੀ ਇਹ ਨਹੀਂ ਦੇਣੀ ਚਾਹੀਦੀ। ਜਿਨ੍ਹਾਂ ਨੂੰ ਐਲਰਜੀ ਹੈ, ਉਹ ਵੀ ਇਸ ਤੋਂ ਬਚਣ।”